Duniya Mein Kaun Kaun Na Yak Baar Ho Gaya - Khwaja Mir Dard

Duniya mein kaun kanu na yak baar ho gaya
Par munh phir iss taraf na kiya, uss ne jo gaya

Phirti hai meri khaak, saba dar-ba-dar liye
Aey chashm-e-ashk-baar ye kia tujh ko ho gaya

Aagaah iss jahaan mein nahi ghair bey-Khuda
Jaaga wohi idhar se, jo moondh aankh, so gaya

Toofaan-e-Nooh ne tou daboi zameen faqat
Main nang-e-khalak saari khudaai dabo gaya

Barham kaheen na ho gul-o-bul-bul ki aashti
Darta hun aaj baagh mein wo tund kho gaya

Waaiz kisey daraawey hai yaum-e-hisaab sey
Giriyaa mera tou naama-e-aimaal dho gaya

Phoolein gey iss zubaan mein bhi gulzaar-e-maarafut
Yaan main zameen-e-shair mein ye tukhm bo gaya

Aaya na aitadaal par har-giz mizaaj-e-dehar
Main garcha garm-o-sard-e-zamaana samo gaya

Aey Dard jis ki aankh khuli iss jahaan mein
Shabnam ki tarah jaan ko apni wo ro gaya