Faqeeraana Aaey Sada Kar Chaley - Meer Taqi Meer

Faqeeraana aaey sada kar chaley
Miyaan khush raho, hum dua kar chaley

Jo tujh bin na jeeney ko kehtey thay hum
So is ahd ko ab wafa kar chaley

Koi na-umeedaana kartey nigaah
So tum hum sey munh bhi chupa kar chaley

Bohot aarzoo thi gali ki teri
So yaan sey lahoo mein naha kar chaley

Dikhaai diye yun ke bey-khud kiya
Hamein aap sey bhi juda kar chaley

Jabeen sajdah kartey hi kartey gaee
Haq-e-bandagi hum adaa kar chaley

Parastish ki yaan taeen ke aey but tujhey
Nazar mein sabon ki Khuda kar gaey

Gaee umar dar-bund-e-fikr-e-ghazal
So is fun ko aisey badaa kar chaley

Kahein kia jo puchey koi hum sey Meer
Jahaan mein tum aaey thay, kia kar chaley