Nisaar Main Teri Galiyon Ke Aey Watan Ke Jahaan- Faiz Ahmed Faiz

Nisaar main teri galiyon ke, aey watan ke jahaan
Chali hai rasm ke koi na sar utha ke chaley
Jo koi chaahney waala tawaaf ko nikley
Nazar churaa ke chaley, jism-o-jaan bacha ke chaley

Hai ahl-e-dil ke liye ab ye nazm-e-bast-o-kushaad
Ke sung-o-khisht muqaiyyed hain, aur sag aazaad

Bohot hain zulm ke dast-e-bahaana-joo ke liye
Jo chund ahl-e-junoon tere naam-lewa hain
Baney hain ahl-e-hawas mudda'ai bhi, munsif bhi
Kisey wakeel karein, kis se mansafi chaahein

Magar guzaarney waalon ke din guzartey hain
Tere firaaq mein yun subh-o-shaam kartey hain

Bujha jo rozan-e-zindaan tou dil ye samjha hai
Ke teri maang sitaaron se har gai hogi
Chamak uthey hain salaasil tou ham ney jaana hai
Ke a sheher tere rukh par bikhar gai hogi

Garaz tasawwur-e-shaam-o-sahar mein jeetey hain
Giraft-e-saaya-e-deewaat-o-dar mein jeetey hain

Yun hi hamesh ulajhti rahi hai zulm se khalq
Na un ki rasm nayee hai, na apni reet nayee
Yun hi hamesha khilaaey hain hum ney aag mein phool
Na un ki haar nayee hai, na apni jeet nayee

Isi sabab se falak ka gila nahi kartey
Tere firaaq mein hum dil bura nahi kartey

Gar aaj tujh se juda hain, tou kal baham hon gey
Ye raat bhar ki judaai tou koi baat nahi
Gar aaj auj pe hai taala-e-raqeeb tou kia
Ye chaar din ki khudaai tou koi baat nahi

Jo tujh se ahd-e-wafa istawaar rakhtey hain
Ilaaj-e-gardish-e-lail-o-nehaar rakhtey hain