Tum Aaey Ho Na Shab-e-Intezaar Guzri Hai - Faiz Ahmed Faiz

Tum aaey ho, na shab-e-intezaar guzri hai
Talaash mein hai, sahar baar baar guzri hai

Junoon mein jitni bhi guzri bey-kaar guzri hai
Agar-chey dil pe kharaabi hazaar guzri hai

Hui hai hazrat-e-naaseh se guftagu jis shab
Wo shab zuroor sar-e-koo-e-yaar guzri hai

Wo baat saarey fasaaney mein jis ka zikr na tha
Wo baat un ko bohot naagawaar guzri hai

Na gul khiley hain, na un sey miley, na maey pee hai
Ajeeb rung mein ab ke bahaar guzri hai

Chaman mein ghaarat-e-gul-cheen se jaaney kia guzri
Qafas sey aaj saba bey-qaraar guzri hai