Soch - Kiun Mera Dil Shaad Nahi Hai - Faiz Ahmed Faiz

Kiun mera dil shaad nahi hai, kiun khaamosh raha karta hun
Choro meri raam-kahaani, main jaisa bhi hun, acha hun

Mera dil ghamgeen hai tou kia, ghamgeen ye duniya hai saari
Ye dukh tera hai na mera, hum sab ki jaageer hai piyaari

Tu agar meri bhi ho jaaey, duniya ke gham yun hi rahein gey
Paap ke phandey, zulm ke bandhan apney kahey se kat na sakein gey

Gham har haalaat main mohlik hai, apna ho ya aur kisi ka
Rona dhona, jee ko Yun bhi hamaara, yun bhi hamaara

Kiun na jahaan ka gham apnaa lein, baad mein sab tadbeerein sochein
Baad mein sukh ke sapney dekhein, sapnon ki tabeerein sochein

Bey-fikrey dhan daulat waley ye aakhir kiun khush rehtey hain
In ka sukh aapas mein baantein, ye bhi aakhir hum jaisey hain

Hum ney maana jung kari hai, sar phootein gey, khoon bahey ga
Khoon mein gham bhi beh jaaein gey, hum na rahein gham bhi na rahey ga