Subah-e-Aazaadi - Ye Daagh Daagh Ujaaley Ye Shab-Guzeeda Sahar - Faiz Ahmed Faiz

Ye daagh daagh ujaaley, ye shab-guzeeda sahar
Wo intezaar tha jis ka, ye wo sahar tou nahi

Ye wo sahar tou nahi jis ki aarzoo ley kar
Chaley thay yaar ke mil jaaey gi kaheen na kaheen
Falak ke dasht mein taaron ki aakhari manzil
Kaheen tou hoga sha-e-sust mauj ka saahil
Jawaan lahoo ki pur-asraar shaahraahon sey
Chaley jo yaar tou daaman pe kitney haath parey
Deyaar-e-husn ki bey-sar khwaab gaahon sey
Pukaarti raheen baahein, badan bulaatey rahey
Bohot azeez thi lekin rukh-e-seher ki lagan
Bohot qareen tha haseenaan-e-moor ka daaman
Subak subak thi tamannaa, dabi dai thi thakan

Suna hai ho bhi chuka hai firaaq-e-zulmat-e-noor
Suna hai ho bhi chuka hai wisaal-e-manzil-o-gaam
Badal chuka hai bohot ahl-e-dard ka dastoor
Nishaat-e-wasl halaal-azaab-e-hijr-e-haraam
Jigar ki aag, nazar ki umung, dil ki jalan
Kisi pey chaara-e-hijraan ka kuch asar hi nahi
Kahaan sey aai nigaar-e-saba, kidhar ko gaee
Abhi chiraagh-e-sar-e-raah ko kuch khabar hi nahi
Abhi giraani-e-shab mein kami nahi aai
Nijaat-e-deeda-o-dil ki ghari nahi aai
Chaley chalo ke wo manzil abhi nahi aai

- Written in August, 1947, at the time of formation of Pakistan.